Бөлімдер санаты

Сөйлеген сөздер мәтіндері

15 қыркүйек 2017
Қазақстан Республикасының Мемлекеттік хатшысы Гүлшара Әбдіқалықованың Кейкі батырдың бас сүйегін жерлеу рәсімінде сөйлеген сөзі

Ардақты ағайын!

Қадірлі қауым!

Бүгін біз тәуелсіз Қазақстан тарихында айрықша орын алатын аса маңызды оқиғаның куәгері болып отырмыз. Ұлы Даланың тұғырлы тұлғасының бірі әрі бірегейі – Нұрмағамбет Көкембайұлының ғасырға жуық уақыт бойы сырт елде сақталып келген бас сүйегі жаңа ғана туған жер топырағына тапсырылды.

Елбасымыз Нұрсұлтан Әбішұлы Назарбаевтың қолдауының арқасында былтыр баһадүр бабаның бас сүйегін қайтару туралы келісімге қол жеткізілгенін жақсы білесіздер. Бұл жайт Мемлекет басшысының халықаралық биік беделін тағы бір мәрте айшықтап берді.

Биыл Қазақстан Үшінші жаңғыру үдерісін бастап кетті. Экономикалық өрлеумен және саяси реформалармен қатар қоғамдық сананы, ұлт жадын рухани тұрғыдан жаңарту ісі жалғасуда. Соның аясында қазір ұланғайыр тарихымыздың зерттелуіне баса мән беріп, бай мәдениетімізді қайта байыптап, ұлттық жадымызды жаңғыртып жатырмыз.

Қазақ елі – сонау сақтардан бастау алып, ғұндардан және Түркі қағанатынан бері жалғасқан терең тарихтың иесі. Сан ғасырлық байтақ шежіреміздің беттерінде ұлтымыздың бүгінгі күнге іргелі ел ретінде жетуі жолында ерен ерлік көрсеткен қаншама жаужүрек батырлардың, қаһарман қайраткерлеріміздің есімі алтын әріптермен өшпестей болып жазылып қалды. Солардың арасында 20-шы ғасырда ерлік дәстүрін жалғастырған сайыпқыран сардар – Кейкі батыр ерекше орын алады. Қазақтың хас батыры, құралайды көзге атқан мерген  Нұрмағамбет Көкембайұлы рухына лайықты құрмет көрсету көрінісіне айналып отырған бүгінгі рәсімнің рухани және қоғамдық-саяси өміріміздегі мәні зор. Мұндай тағылымы мол оқиғалар арқылы халық санасы өсіп, ел бірлігі нығайып, ұлт рухы асқақтай түседі деп сенемін.

Иә, тарихымызда тәуелсіздік алғалы қайта қарастырылып, толықтырылып жатқан ақтаңдақ тұстар аз емес. Соның бірі – осынау киелі Торғай өңірінде басталған 1916 жылғы көтерілістің беймәлім беттері. Ұлт-азаттық сипатындағы сол оқиғаның басы-қасында жүрген Кейкі баһадүрдің тағдыры талайлы болып, оның рухы туған халқымен енді, міне, қайтадан қауышып жатыр. Ол – атақты халық батыры Амангелді Үдербайұлының бастасы, үзеңгілес серігі болған, елінің амандығын, жұртының азаттығын, көптің қамын ойлап, сол жолда қаны мен жанын аямаған нағыз жаужүрек, қайтпас қаһарман.

Кейкі батыр тұлғасы мен тағдырының ерекшелігі – өз заманындағы егескен екі жүйеге де емес, ел-жұртына ғана қызмет еткендігі, есесі кеткеннің жоғын жоқтап, зорлық көрген жандарды жақтап өткен әділеттіліктің жаршысы бола білгендігі. Өжеттігі мен өрлігіне қоса, ол парасаттың туын биік көтеріп, ар-намысты бәрінен жоғары қойған абзал болмысымен айрықша өркештеніп тұрады.

Біздің қазіргідей азат, төрткүл дүние түгел мойындаған жаңа тұрпатты тәуелсіз мемлекетіміздің арғы тарихының парақтарында осындай орны бөлек ерлердің ерен істерінің өшпес іздері жатыр. Яғни, біз – бабалар жолын жалғастырған жоралы жұртпыз, Кейкі батыр сияқты еңіреген ерлердің мұрагеріміз, ұлағатты ұрпақпыз. Біз бүгін сол асыл азаматтардың өр рухының алдында тағзым етіп, елдік жолындағы ерліктері үшін басымызды иеміз!

Халқымызда «Өлі разы болмай, тірінің көсегесі көгермейді» деген тағылымды сөз бар. Мен осынау оқиғаны киелі Қазақ жеріне ұлттық рухтың оралуына балар едім. Бәрімізге Алла жар болып, ата-бабаларымыздың әруағы қолдап жүргей!

Біз өнегелі өткенімізді қастерлеп, баянды бүгінімізді бекемдеу арқылы жарқын болашаққа батыл қадам басып келеміз.

Қазақ Елі өсіп-өркендей берсін!


Барлық cөйлеген сөздер мәтіндері
 
Басқа cөйлеген сөздер мәтіндері
Барлық cөйлеген сөздер мәтіндері