Кеңес барысында 5 институционалдық реформаны жүзеге асыруға арналған «100 нақты қадамды» орындау аясында қамаудағы адамдарды камераларда ұстауға көшу және оларды жұмыспен қамту мақсатымен түзету мекемелерін жаңғырту ісіне қатысты Мемлекет басшысы
тапсырмаларының орындалу барысы қаралды.
Жаңа қылмыстық заңнама санкциялардың жазалаушылық сипатын бәсеңдетуге және көп жағдайда бас бостандығынан айырудан өзге жазаларды қолдануға мүмкіндік берді. Нәтижесінде алғаш рет түрме контингенті 41 мыңға дейін азайды. 2001 жылы түзету мекемелерінде 88 мыңнан астам адам болған.
Қазіргі кезде қолданылып жүрген қамаудағы адамдарды жасақтық-барактық негізде ұстау тәжірибесі жазаның тәрбиелік әсерін төмендетеді және криминалдық келеңсіз дағдыларды жоюға ықпал етпейді. Бұл проблеманы шешу үшін камераларда ұстайтын түзету мекемелерін пайдалану қажет.
Қамаудағы адамдарды жұмыспен қамтуға қатысты бұл көрсеткіш соңғы 10 жылда 50 пайыздан аспағаны атап өтілді. Сотталғандарды еңбекпен қамту кесілген жазаның тиімділігін арттыруға мүмкіндік береді, сондай-ақ оларды тұрақты кіріспен қамтамасыз етеді. Бұл табысты олардың қылмысы арқылы келтірген зиянын өтеуге бағыттауға болады.
Осыған байланысты қамаудағы адамдарды еңбекпен қамтуды ұйымдастырудың жаңа түрлері мен тәсілдерін, оның ішінде еңбекке ынталандыратын қосымша шаралар енгізу қажеттігі туралы шешім қабылданды.
Сондай-ақ түзету мекемелерінен босатылған адамдарды әлеуметтік бейімдеу жүйесін дамыту бағыттары талқыланды.
Кеңес қорытындысы бойынша мемлекеттік органдарға бірқатар тапсырмалар мен ұсынымдар берілді.